剛剛過去o既7.1,除o左係回歸日之外,亦係富足主入行1x周年紀念日,自己向來對呢o的日子冇乜感覺,亦更加唔會特別慶祝,所以呢一日就同角足主以及其他隊友,去左銅鑼灣同記協一齊遊行。

自問對政治涉獵唔多,只不過呢幾年見到香港民不聊生,領導者仲夠膽死話「唔敢自滿」(我諗呢個世界上得角足主同可樂暉面皮厚得過佢),都希望可以盡一分力,上街表達下不滿。當然亦想畀個signal角足主知道,我呢o的做細o既,平時雖然唔聲唔聲,但都係敢於發言。最衰就係喉嚨o岩o岩好番,嗌唔到「角足主下台」。

夏體硬雖然未完全職業化,洞房計畫亦未出台,但係眼見大部分隊友都好識做,知道出席呢o的公開場合,梗係要著番贊助商服飾,點知有人身為高層就唔生性。本來冇人知都冇乜所謂,但就衰在佢畀攝記行家影到相,仲放埋上網。結果就令熱心支持夏體硬o既贊助商,白白失去一次曝光o既機會。須知道「這些機會不是經常屬於你的」,冇人知會唔會仲有下一次,富足主對此表示非常遺憾。

__

寫到呢度,見到拜仁有位新加盟球員,o係記者會上因為著左同球會贊助商有衝突o既Tee,惹起軒然大波。仲記得傑志出外比賽時,曾經有球員拎o左印上另一個贊助商LOGOo既行李o急,而要被球會罰款。呢獲角足主斷到正一正,吟詩都吟唔甩o架喇,唔知佢又會有咩表示呢?

富足主
logo-dlm-small

Comments