【體路專欄】夏體硬上星期踢o左今屆記協盃第3場分組賽,結果贏ATV 8比0,小組連贏3場,只要最後一仗唔係大比數輸波,都可以首名出線8強。

有追開呢個專欄o既朋友,都記得富足主唔太滿意球隊上一場表現。今場唔知國足主係咪想卸隻鑊畀我,竟然「解凍」放富足主落場踢o左一陣,而8比0呢個戰果證明o左乜,相信亦唔使在下多費唇舌,不如等各位睇o下片。

唔知大家仲記唔記得,旱幾期富足主講過#giveme5000呢個活動?其實夏體硬一直以來o既比賽片段,就係出自黑龍波同埋秋本駿兩位大師,我o地今屆目標,就係各場賽事點擊率加埋有5000次,呢個數字話多唔多,話少唔少,就睇下可唔可以快過港甲平均入場人數,首先達到呢個目標先。

為o左追近亞洲一線水平,夏體硬已經逐漸走向職業化,除o左每場賽事都有直播(文字)或錄播(youtube)之外,亦要顧及各個贊助商需要。好似今屆nike為球隊設計o既外衣,亦首次印上《體路》個logo,夏體硬亦成為全銀河系首支印上呢個logo o既球隊,對我o地同埋《體路》o黎講,都絕對係一個里程碑,多謝各位支持。至於呢件咁獨一無二o既外套,暫時仲係限量生產,不設發售,或者等有朝一日,夏體硬發展成為亞洲知名球隊之後,先至出件復刻版啦。

DLMjersey_SR

富足主
logo-dlm-small

Comments