188205_10151600925135561_2033658971_n剛剛過o左o既星期六,我地夏體硬o係四強,贏o左前身係有線電視足球隊o既「TVU」,翻查往績記錄,我地咁多年o黎,N次o係記協盃對親有線都係輸波收場,對上一次打入記協盃決賽,正正就係輸比有線屈居亞軍,所以呢,今次唔單止入決賽,仲係o係宿敵面前吐氣揚眉呀!

講番場波,認真峰迴路轉,我地開波前,諗住狂攻佢地兩閘,用體力化車輪戰車死佢地,點知開波無幾耐,我地o既後防「定海神針」阿聲,就有一野十年都唔見一次o既低級犯錯,比對面個前鋒單刀射入,當時場內同場外o既隊友,個心都涼o左一截,一來阿聲除o左係公認o既好好先生、極具專業作息操守o既球員,二來有同佢踢開波都知,要o係佢身上搵犯錯機會,機會率同中一劑六合彩無乜分別,加上對手TVU踢法硬朗,所以,士氣即時減10。

(事後有陰謀論話,阿聲係為o左激勵我地鬥志先咁做,阿聲聽完無出聲,只係嘴角露出半絲冷笑,拿!呢d咪型囉,下下比人質疑就出o黎解畫甚至擺女人上檯果d,一比之下真係高下立見。)

今場我地有「夏體硬列基美」陳曉明復出,實力應該高o左一截,佢先係一個助攻比強仔扳平,下半場一個招牌攝位頭槌,幫我地反超前,最後我地由「夏體硬杜奧巴」阿威埋齋,贏3比1。

538197_10151600926450561_1253876970_n

好喇,我覺得如果我唔開誠布公講下自己有乜o野戇居野,副足主係唔會放過我:

1.我踢o左唔夠半場就斷片,要嗌場邊換人

2.斷片期間連自己隊波追番球都唔知

3.到下半場一直以為只係贏緊2比1,無換番幾個後衛出去守

4.下半場再一次換出去(記協盃特有賽例,換出可以再換入,但扣兩次換人名額)時,禁區內吸過後衛,但射o左出界浪費機會

5.好喇,到完場喇,真係戇居居咁upload 2比1 呢個戰果上facebook,結果唔洗問

或者咁樣講自己真係有失霸氣,但為不失霸氣而有錯唔認又有違夏體硬o既核心價值,所以,都係坦白好d。

國足主

logo-dlm-small

Comments