首先祝各位聖誕快樂,多謝大家聖誕假期都仲抽時間睇本毒男寫膠文!

NBA聯盟搵銀方法層出不窮,每年趁聖誕檔期獨食收視之餘,今年更隨聖誕大戰推出一系列產品,例如聖誕特別版短袖球衣、聖誕特別版球鞋等等,雖然低招但又有人受,真係吹佢唔漲。不過,講到NBA最經典、最有滲透力嘅賺錢手段,就非「造王者」莫屬喇。

請讀者朋友唔好誤會,雖然「許許許許許」深入民心,但本文絕對唔係講緊雞汁台劇集-《造王者》,而係探討近十年間,NBA一眾裁判「誤判」連連,為聯盟「造王」嘅例子。今日Boxing Day,就讓我地一齊重溫昔日球證送比巨星們嘅三件大禮!

20131226-yinnba

設計對白

注:以下只係阿言嘅觀點,歡迎各位球迷交流意見!

1. Dwyane Wade
案例:2006年NBA總決賽第五場 熱火加時101:100小牛,Dwyane Wade「神龍擺尾」搏得犯規,罰球絕殺

好對唔住熱火fans(我對熱火並無任何不滿),但Wade當年憑「體毛罰球」,帶領熱火以局數4:2擊敗小牛,成為03一代第一個冠軍級人馬,實在係「造王」嘅最佳例子,沒有之一。

Wade係第五場有超過5次「體毛哨」,然後係比賽最後階段,先黎一個疑似Backcourt Violation,然後再一下擺首弄姿,然後就沒有然後。

Wade果場就射入21球罰球(同成隊小牛一樣),成個系列賽計,佢有97次罰球機會,兩項數據都打破NBA總決賽紀錄,真係可喜可賀。

2. Kobe Bryant & 湖人
案例:2008年NBA總決賽第二場 塞爾特人108:102湖人,罰球數-塞爾特人38:10湖人

今次嘅主角-高比仔雖然已經到達「球王」級別,但08年總決賽卻被球證擺了一道。事關當年係塞爾特人「三巨頭」合夥首年,所以喺系列賽第二場,高比喺第一節尾段無故被吹第二次犯規,被迫坐板凳;然而當佢剷籃被大力打手(大力水手個friend?),球證卻視若無睹。

成場比賽計,湖人一共有10次罰球機會,Pau Gasol、Lamar Odom被N次打手,但只得1球罰球;綠軍則明顯受球證寵愛,全場38次喺罰球線起手,最終以6分之微擊敗湖人,領先場數2:0,真係唔該晒。

3. Lebron James
案例:2006年季後賽首輪第三場 騎士97:96巫師,Lebron James「step,hop,step,step」(又稱四步上籃)絕殺

雖然King James近年係熱火組團後,已經再冇「明星雞」待遇,甚至同好友Carmelo Anthony一樣「唔流血唔會有罰球射」(請原諒我偏愛Anthony,Fans係咁架啦~),但無可否認,當年LBJ受聯盟力捧,「四步上籃」屢試不爽,於2006年季後賽首輪更因球證「睇漏眼」,成功走(步)籃絕殺,領先場數2:1。

後記:每年冬至左近,NBA.com都會推出年段Top 10片段。老實講,年年啲Highlight咪又係果幾個畫面,阿言就嫌佢陳腔濫調,睇下啲另類野仲有新鮮感。

Comments