臨近年尾,又係擺酒結婚o既高峰期,夏體硬呢排亦都喜事重重,繼成功踢走可樂暉同黑龍波,同埋射手雷蒙威上個月小登科之後,下星期就輪到我o地o既首席後備前鋒5+HIM,同佢o既細細粒共諧連理,真係恭喜恭喜。而且佢張帖都好整得好有心機,o係度畀大家先睹為快。

__ 1

__ 2

__ 3

近日被撬牆腳的國足主,收到5+HIM喜帖時一臉尷尬。(相片經過處理

近日被撬牆腳的國足主,收到5+HIM喜帖時一臉尷尬。(相片經過處理)

由於撞正5+HIM大婚,所以原定呢個月14日場記協盃分組賽,亦都要就一就。其實今屆賽事o係上星期已經開o左波,揭幕戰新報對電台人戰果,至截稿時官網就仲未公布,不過富足主就收到風踢成1:1。記協呢幾年為o左搞好呢隻記協盃,都可以話係盡心盡力,雖然有時做o野未夠完善,但係大家一場行家都會理解,畢竟要搞好一個比賽,「真係唔係想像中咁易」(堅sir腔),尤其當見到足總個官網o既時候,就更加唔會對記協有咩挑剔。

講起足總個網,今季改版之後,富足主身邊幾乎所有行家,都係彈多過讚,唯一一個冇彈o既,就係o個位剩係識玩電話但唔識上網o既前輩。我唔介意你播埋o的唔啦更o既廣告,但係o的資料可唔可以唔好收收埋埋,同埋可唔可以認真少少呢。

富足主最睇唔過眼,就係有乜理由連邊個入波都睇得錯!今屆最經典一幕,就係南華對晨曦,翟廷峰入波,當時球證就話係李威廉入,搞到嗌咪o個位足總職員亦搞錯o左。如果你話一時睇錯,ok,事後睇片改番咪得囉,點知足總一直冇改,之後隔o左一排,都仲係寫李威廉入(依家已經改番)。最慘公司o的老細話乜都要跟官方,就算係錯都要跟。如果各位讀者第二日見到o的報紙都寫錯,其實記者都只係食死貓o架。

後來問番有關職員,明明睇片都知錯o左,點解死都唔肯改呢,原來佢o地話一切要以球證份report為依歸,佢一日唔改,足總報告都要跟。富足主聽完之後,衝口而出o左三個字。之後晨曦對飛馬場波,亦發生同樣問題,晨曦球波明明係盧高頂入,但球證又判左蘇偉泉擺烏龍……

其實一個有責任心o既人,自己做完o野,照道理都會好緊張自己有冇犯錯。行家們做完一場波,都會第一時間睇片,睇下自己有冇睇錯o野啦。作為一個主宰場上生殺大權o既判官,如果有少少責任心,事後睇番比賽片段,應該會發現自己錯o左o的乜o卦?

富足主
logo-dlm-small

Comments