對鐘意踢波或者做運動嘅人黎講,冬天真係一個令人又愛又恨既季節。

愛嘅係終於唔洗係個熱辣辣既天氣下做運動。你要明白夏天做運動真係痛苦好多,個太陽曬到正一正,著住白鞋踩落場一陣都覺得腳板底「慶」,甚至係睇到地下啲蒸氣「標」緊上黎。見到太陽好似疆屍咁會灰飛煙滅,落到場要不斷揾陰影,咁搞法真係唔想做運動架!但冬天就唔同呢,就算球場比個太陽曬住都會覺得係上天既恩賜嘅温暖,唔想個太陽走,係唔同架。而最正既係可以學啲職業足球員咁,買啲打底緊身衫呀,legging呀,窄腳褲呀,冷帽呀,手襪呀咁樣,當正係職業球員勁齊裝備,唔踢得都睇得呀。明明唔係好凍又無落雪,但一feel 到稍為有啲凍就即刻全副武裝出動。我最記得以前睇英超球員戴nike手襪,自己又好想要番對,奈何揾唔到,於是自己畫左個nike 落塊細布,再縫係對手襪到,哇塞!幾可亂真!而家諗番起都想整番對!

1460033_555221741227869_712861112_n

但講起恨就真係可以恨之入骨。冬天凍都算啦,乾燥個下先難頂。跑兩跑鼻就乾到好刺痛,feel 到入面好似龜裂想爆炸,流鼻水又唔係;流鼻血又唔係,總之呼吸勁辛苦,透唔到氣咁,仲辛苦過夏天吸入太多塵而不斷咳。但講到最大問題,始終都係離唔開凍!冬天留在被窩裡過日晨是常識吧?邊會有人願意離開被窩,仲要然後換衫落街去球場同你食風?啲手腳同啲筋都薑硬晒。唔好話踢波,真係連柯屎蚊起塊廁所板然後坐落去都凍到入心入肺,真係揾鬼同你踢波。所以冬天揾人踢波真係好似同人借錢咁:「x,揾第二個啦…」

但對於我黎講,我係中意踢冬天波多過夏天波!

Comments