今個禮拜,對好多人o黎講,最有印象係開學,但對於我地成班體記o黎講,就係漫長o既全運會正式開始。

唔少行家包括我o地兩大中鋒5+HIM同阿威都身先士卒去o左瀋陽採訪,其他o既大部份都取消休假迎接兩個星期宅居公司不見天日,就連體路呢個網站搞手阿菲都要北上,有好多人會覺得,全運會o者,又唔係奧運,洗唔洗搞到咁大陣仗呀?

如果大家真係咁諗,得罪講句,真係太天真喇(唔好打頭唔該)!

無錯,論規模論格局,全運會都只係一個全國比賽,聽落同奧運會呢類全球性比賽差一截,但係有深入留意體育新聞、心水清o既老友都會發現,無論邊個項目,無論邊隊代表,無論係咩大熱門都好,你去訪問佢地個教練,佢地九成都會答:「全運會?難。可能比奧運更難」

大家又諗,好多世界級選手都無參賽,咁難在咩呢?答:意外囉。

當然,我講o既「意外」,同大家心目中o既意外,係有些少區別,套用國內行家用字,應該叫「被意外」;用廣東話講得白D,可以叫「俾人做」或「中伏」。

呵呵,睇到呢度,如果你係三四十歲,生活上曬岸o既離地中產,一定會覺得我係o個種「經常反共兼帶有被害妄想症o既典型80後」係o既,我的確80後,至於係咪反共係咪被害妄想症呢?我唔會否認更唔會承認,只想借呢個專欄同大家分享下全運會點點滴滴:

※港隊馬術隊四位選手林立信、林子心、賴楨敏同鄭文傑,四個人四匹馬加一匹後備馬去到瀋陽,比賽前兩日鄭文傑同林立信隻馬都受傷,無法出賽,由於全隊只得一隻後備馬,所以鄭文傑就做觀眾,林立信要用隻後備馬o黎爭衛冕,結果港隊o係原本4個人玩o既團體賽以3條友應戰,最後得第4,林立信o係個人賽亦衛冕失敗,賴楨敏就贏得銀牌

※香港男子欖球隊,基本上去到全運係超班,因為香港o係國際賽對住國家隊都係佔到優勢,對住省區代表隊會係點,大家應該諗到,不過港隊去到決賽,半場領先12比0之下,下半場一開波就比人罰走一個,最後幾分鐘俾球證連吹8個犯規,結果係山東反勝贏冠軍

※上屆山東全運會,大熱門王史提芬去到決賽,一開波就甩鏈;單車隊訓練時又比工作人員阻撓…

其他省隊遇到o既「意外」,我就唔提了,有興趣o既讀者可以去任何一個搜尋網站打「全運黑幕」,相信會滿足到你地o既求知慾;或者大家會問,點解內地同胞同省隊,會咁重視全運會呢?好簡單,錢囉,全運會規模同競技水平或者不及奧運,但獎金就甘囉,8年前江蘇舉行o既第十屆全運會,各省獎金已經相當驚人:

江蘇四十萬加一層樓
廣東三十萬
北京廿五萬
上海廿三萬
山東廿萬

八年前尚且係咁,而家呢?

我就無好深入咁搵,因為就算搵都好難搵得咁detail,有都河蟹啦係咪,不過就有報道話浙江男足贏的話,每人五十萬,另外又傳有不知名省市男籃贏的話,每個主力三百萬人仔,嘩,爽呀,難怪早幾日女子七人欖球四強之前,北京隊已經收到風話「只要你地放水,就會有雙倍獎金」,可見全運會唔單止贏o既有得著,輸o既都好有錢途

全運會呢件盛事,其實本身就已經係一個好好o既國民教育課題,只不過我肯定,無乜邊間支持國民教育o既中小學,會敢搞個trip帶班學生去觀摩一下祖國的人文發展囉。
角足主

logo-dlm-small

Comments