前一陣子得閒睇吓一啲健身嘅forum,見到好多人都話如果要減肚腩就做sit up啦,大家有無發覺我由舊page到依家新page都無講過一啲sit up嘅topic,每次啲人問點強化腹部肌肉,我都係叫人做捲腹,點解唔做sit up呢?

並唔係話sit up 就好似人人天生就識做所以唔講,今次同大家研究吓sit up呢個鍛煉啦……

20130828-jerryliu01

首先我地睇吓(1.),唔駛講大家都試過做到開始無力嘅時候就會雙手擺頭後面,不停咁將自己chok上去,無錯你chok到個人上去,可以幫助你完成心目中想做嘅次數,但係亦都隨時chok親條頸椎。

(2.),當你上到去嘅時候有無發覺有時呢個位有啲痛呢,因為你上身嘅力已經比晒條尾骨(即係尾龍骨),咪又易受傷囉。

(3.)有時你會揾人按住對腳或揾嘢勾住對腳來做,都未到無力你已經要靠對腳chok上去,大佬~你依家練腹呀,你chok對腳做乜?

最重要嘅係……做sit up仲會強化埋一條我地不應強化嘅肌肉 – 髂(音ka)腰肌

髂腰肌由第12節胸椎、腰椎、髂骨起到股骨(大脾骨),過度強化呢條肌肉會導致骨盤前傾(即好似唐老鴨咁趷pat pat),令到下背痛,但係其實係日常生活中,走路、跑步、sit up、提腿時都會不知不覺間鍛煉到這條肌肉,所以要多做伸展(遲啲會講點伸展)

當然sit up呢個鍛煉流傳咗咁耐,對腹肌鍛煉都唔係話無用嘅,但係有一個更安全有效嘅捲腹,點解唔用呢?安全第一最要緊

20130828-jerryliu02

上面講過度鍛煉髂腰肌會導致骨盆前傾變唐老鴨、下背痛,但係亦如我之前所講呢條肌肉係我地平時行路、跑步、提腿都有機會強化到,所以得閒就同佢做吓伸展啦……

髂腰肌伸展 Lliopsoas stretching
以相片為例,如要伸展左邊髂腰肌,先跪在軟墊上(圖1),然後再將右腳向前方伸直(圖2),跟住再將身體向前推,令到右腳曲到約90度(圖3),上身保持腰背挺直,感覺到左邊腰到大腿位置有拉扯感覺便可,保持姿勢約10-15秒。

得閒留意吓身邊仲不停做sit up嘅朋友,睇吓佢地係咪個pat pat 趷吓趷吓咁……
想知更多體適能資訊可到我的Facebook Page “高級私人教練 Jerry Liu”,多謝支持!!

Comments