上次篇網誌出咗街之後,好多朋友覺得好驚奇之外,仲係咁問我何謂「足以影響一生嘅旅程?」既然大家咁有興趣,今次就同大家分享下人生中幾個特別嘅旅程…

charmwingkei-1

今年11月,我哋精薈六子同南華文邦一行7 人去咗越南旅行,吃喝玩樂唔係重點,總之成班兄弟一齊,一句到尾就係開心!精薈同南華呢幾年為咗聯賽冠軍爭崩頭(當然今年YMCA都對我哋兩隊都非常有威脅),大家都可能覺得我哋嘅關係有啲奇怪,但可愛嘅地方係我哋永遠都「友誼第一,比賽第二」。每逢大時大節,開心唔開心,唔理你打邊隊,唔理你有幾忙,大家總會聚一聚,「一世好兄弟,唔駛講嘢,兩脇插刀…(下刪一千字醉酒說話)」,呢份感情,呢份友誼由我哋開始成為香港隊球員開始…

charmwingkei-2

要數返我對上一次同呢班「球星」出埠,已經係差唔多十年前嘅多哈亞運會。先唔講正式比賽嗰段時間,只係講備戰都有排講。記得個日2006年8月31日,我同仕仁一齊去咗Poly嘅校務處,我哋一齊「Defer」(休學)半年,為嘅就係備戰亞運會!當年我諗得好簡單,做我想做的;而家諗返,多謝爸媽嘅支持,否則都可能要Retake…就係咁,9至12月,我哋就好似明星咁成日去唔同地方集訓,深圳,廣州,天津,北京,由台北打到台南…當中除咗技術上嘅進步,同時令我地嘅視野闊左好多,感受到好多唔同嘅文化…讀萬卷書不如行萬里路係真嘅!

charmwingkei-3

不得不提嘅一件趣事,我哋喺北京集訓嘅期間,每朝早王耀廷教練都同我哋係訓練基地嚟個早課,平日就係跑步練下心肺,或者做下簡單力量訓練。我哋每晚都係著住波衫波褲訓覺,以便第二朝爭取時間賴床。有一日,如常6點起身準備夢遊一般的早課,王教個日叫我哋上車,我哋都覺得好奇怪…上左車,唔駛問阿貴個個訓到隻豬咁,一睜開眼,我哋見到「萬里長城」!當然,唔係簡單遊覽,教練指一指上面其中一個「哨站」,我哋要限時內跑上去…達標就食早餐,唔達標就嚟多個來回…去過長城嘅朋友都知,個啲梯級高低不一,有啲成半個人咁高,唔只跑,仲要爬!側邊嘅遊客係咁影相,你話我哋似古代秦兵去保家衛國又得,現今就成班Running Man咁亦不為過!最好笑嘅係我哋瞓覺係唔著底褲或者內膽…人生第一次去長城,我哋又要跑又要爬,仲要真空上陣,只可以講我哋已經超越咗「不到長城非好漢」嘅境界!

charmwingkei-4

經過幾個月集訓之後,終於去到多哈,一落飛機第一個感覺係好荒蕪,沙塵滾滾,去選手村嘅途中見到好多金色嘅巨型別墅及鑽油台。選手村入面見到好多體壇明星,中田英壽坐喺我哋隔離食飯,行行下撞到劉翔同易建聯等…當然,我最想講除咗第一次踏足中東地區,以及亞運會嘅盛大令我哋大開眼界之外,最緊要係我哋達到手球生涯一個里程碑!

charmwingkei-5

初賽,我哋同組有科威特,伊朗同中國隊(結果科威特冠軍,伊朗季軍),我哋唔係職業隊,所以有機會同一班高手過招,其實我哋已經好開心,盡量喺佢哋身上學習。(當年曾經有過一個感覺,亞運會返到香港之後,去彩虹道睇波覺得所有嘢都好慢。嗱,呢下唔係囂張,唔止我一個人係咁覺得)

講返比賽,我哋想用贏波作為對自己及所有支持者嘅交代,所以喺賽前教練都集中火力部署名次賽。最後,正如教練意料之內,我哋遇上了實力相當嘅烏茲別克。我哋成班兄弟,由賽前睇對手比賽,再睇錄影Replay,針對式訓練以至賽前熱身,大家都用上了百二分嘅心力。雖然每個人心入面都好想贏,不過越想贏就越大壓力,所以我哋都不斷同自己講要平常心,放低包袱,咁樣先可以發揮到應有水準。到比賽當日,分數一直咬得好緊,我哋打「士氣波」,得分或者成功防守,全隊振臂高呼;射失或者防守失誤,依然給隊友鼓勵,絕不埋怨!就係咁,過咗人生其中最緊張嘅60分鐘,我地以35:32贏咗,這是香港手球隊歷史上在亞運會嘅第一場勝仗!

搵資料期間,搵返王子嘅精華片段:

玩團體運動除咗要分高下,鍛鍊身心之外,學習人與人之間嘅相處及溝通都非常重要。每個人想法不一,所以要做到思想統一,互相支持,團結就是力量,講嘅都係感情同心態!打手球對於我而言,最重要係識咗一班不離不棄嘅好兄弟,我哋識於微時,好多嘢大家一齊面對過經歷過,所以到今時今日都係有問題就一齊解決,無問題就「盡興」到底!多謝你哋令我嘅人生咁多姿多彩!

上面嘅體會,只係我係香港隊生涯嘅一少部份,仲有好多好多,有機會再同大家分享。

Comments